ऋतु हिरवा

ऋतु हिरवा

डोळ्यावरल्या गांधारीच्या

सतीत्व पट्ट्या सोड

काया न तुझी गौररुपाची

सर्वांगाला कोड.||१||

वटवृक्षांच्या पारंब्यासम

ध्यानस्थाचे सोंग

प्रपंचून घे दुःखे सारी

संसार नसे हे ढोंग ||२||

जळी, तळी, विहिरीकाठी

पाण्याचे संचित नसते

झर झर झरता झरता 

गंगा भगीरथ होते ||३||

पडीत राहून वांझ महीची

विरागिनीची  दैना

फाळामधुनी फुटुनि येता

सुखास जातो महिना ||४||

वणवणतांना रानामधुनि

पायी खुडु दे काटा

रक्त सांडता खाली थोडे

ऋतुहिरव्या होतील वाटा ||५||

--गजेश तोंडरे